សាកអានអត្ថបទនេះនៅលើ iPhone៖
---------------------------
កម្លាំងកងរាជអាវុធហត្ថរាជធានីភ្នំពេញបានដឹកនាំកម្លាំងចុះចាប់ខ្លួនអតីតមេបញ្ជាការកងអង្គរក្សលោក ជា ស៊ីម ឈ្មោះ ឈឿន ចាន់ថន ផ្កាយ៣ និងកូនចៅ ៣នាក់ទៀត នៅព្រឹកថ្ងៃសៅរ៍ ទី១៣ សីហា ស្ថិតនៅផ្ទះលេខ៦៥ ផ្លូវ៩៥ សង្កាត់បឹងកេងកង៣ ខណ្ឌចម្ការមន រាជធានីភ្នំពេញ។
មេបញ្ជាការរងកងរាជអាវុធហត្ថរាជធានីភ្នំពេញ លោក ពង្ស សាវរិទ្ធ បានមានប្រសាសន៍ថា ឥឡូវនេះអ្នកទាំង៤នាក់ គេបញ្ជូនទៅឃុំខ្លួននៅទីស្នាក់ការកងរាជអាវុធហត្ថរាជធានី។
លោក ពង្ស សាវរិទ្ធ បានបញ្ជាក់ថា ការចាប់ខ្លួននេះ តាមដីការបស់ព្រះរាជអាជ្ញារងរាជធានីភ្នំពេញ ប៉ុន្តែលោកមិនទាន់បញ្ជាក់ច្បាស់លាស់នៅឡើយ អំពីមូលហេតុនៃការចាប់ខ្លួន ថាពាក់ព័ន្ធទៅនឹងរឿងអ្វីនោះទេ។
ព្រះរាជអាជ្ញារងសាលាដំបូងរាជធានីភ្នំពេញ លោក មាស ច័ន្ទពិសិដ្ឋ មិនធ្វើអត្ថាធិប្បាយជុំវិញករណីនេះទេ ដោយលោកបញ្ជាក់ថា ករណីនេះ ស្ថិតនៅក្នុងនីតិវិធីស៊ើបអង្កេត ៖ "ខ្ញុំអត់ទាន់ជម្រាបជូនបានទេ សូមអធ្យាស្រ័យ"។
ទោះបីជាយ៉ាងនេះក្ដី កាសែតក្នុងស្រុកចំនួនពីរ បានចុះផ្សាយទាក់ទងទៅនឹងការចាប់ខ្លួនលោកផ្កាយបី ដែលជាប្រធានកងអង្គរក្សលោក ជា ស៊ីម នេះថា ពាក់ព័ន្ធទៅនឹងគ្រឿងញៀន និងថាពាក់ព័ន្ធបទរំលោភលើសេចក្ដីទុកចិត្ត និងឆបោកលោក ជា ស៊ីម ក្នុងការយកថវិកាទៅកសាងសមិទ្ធផលផ្សេងៗ។
ប្រធានគណបក្សសិទ្ធិមនុស្ស លោក កឹម សុខា បានសាទរចំពោះការចាប់ខ្លួន ឬការបង្ក្រាបមន្ត្រីមានអំណាចនានារបស់រដ្ឋាភិបាល ប៉ុន្តែលោក កឹម សុខា បានបញ្ជាក់ថា រដ្ឋាភិបាលគួរតែចាប់ជាទូទៅ ៖ "បង្ក្រាបទូទៅគឺថាអ្នកណាខាងណាបក្សពួកណាក៏ដោយ ឲ្យតែធ្វើខុស តែកន្លងមកការចាប់ខ្លួនអ្នកធំនៅក្នុងគណបក្សប្រជាជន ទាក់ទងគ្រឿងញៀននេះ ភាគច្រើនខាងខ្សែតា ជា ស៊ីម"។
រហូតមកទល់ពេលនេះមិនទាន់មានប្រភពឯករាជ្យណាមួយបញ្ជាក់ថា ការចាប់ខ្លួនប្រធានអង្គរក្សលោក ជា ស៊ីម និងកូនចៅ ៣នាក់ទៀត ថាពីបទអ្វីពិតប្រាកដនៅឡើយទេ។
កាលពីថ្ងៃទី១២ ខែមករា ឆ្នាំ២០១១ ក្រសួងមហាផ្ទៃបានចាប់ខ្លួនលោក មឹក ដារ៉ា មន្ត្រីជាន់ខ្ពស់ទទួលបន្ទុកអាជ្ញាធរជាតិប្រយុទ្ធប្រឆាំងគ្រឿងញៀន និងមន្ត្រីនៅក្រោមបង្គាប់មួយចំនួនទៀត ដែលមានជាប់ពាក់ព័ន្ធរឿងអាស្រូវក្នុងអំពើពុករលួយក្នុងការបង្ក្រាបការជួញដូរគ្រឿងញៀន។
នៅថ្ងៃទី១៣ សីហា លោក នាយករដ្ឋមន្រ្តី ហ៊ុន សែន បានចេញអនុក្រឹត្យតែងតាំងឧត្ដមសេនីយ៍ឯក យឹម លាង ជាមេបញ្ជាការកងឯកភាពអង្គរក្សលោក ជា ស៊ីម ប្រធានព្រឹទ្ធសភា បន្ថែមលើមុខងារបច្ចុប្បន្ន។ ការតែងតាំងនេះ ធ្វើឡើងភ្លាមៗ បន្ទាប់ពីគេចាប់ខ្លួនអតីតប្រធានបញ្ជាការកងអង្គរក្សលោក ជា ស៊ីម ឈ្មោះ ឈឿន ចាន់ថន នៅព្រឹកថ្ងៃទី១៣ សីហា ដដែល។ ក្នុងអនុក្រឹត្យតែងតាំងនេះបានសរសេរថា ការតែងតាំងប្រធានកងឯកភាពអង្គរក្សថ្មីនេះ យោងទៅតាមសំណើរបស់លោក ជា ស៊ីម៕
No comments:
Post a Comment